في حاجه غلط

عجبي علي الجدعان اللي ليهم اهل وخلان وادفنوا من غير لا اسم ولا عنوان 

عجبي علي الثوار اللي مشغولين في الحوار ونسيوا يودعوا جثمان الشهدا الاحرار

عجبي علي دوله آل وقفه مع الثوره وهي لا عامله حساب لثوار ولا شهدا ولا ثوره 

عجبي.....

اول ما سمعت ان في شهداء مجهولي الهويه حيدفنوا في مدافن الصدقه اليوم الخميس جاتلي حاله من الحزن والاسي وبدأت اتصور المشهد المهاب اللي حتكون عليه الجنازه دي . بدأت اشوف في خيالي طبعا اعداد كبيره ورا الشهدا وحزن مخيم علي كل حته في مصر . يفكرنا بكل اللي كان بيحصل ايام الثوره وفكرت اروح بس لما عرفت الخبر كانوا ادفنوا اصلا 

وبعد ما شفت منظرالجنازه والعشرات القليله اللي كانت وراهم جاتني حاله من الاستغراب علي ذهول علي انفعال .ازاي يعني في ثوار شهدا في احداث يناير ويكون حقهم معدوم بالطريق دي ...

لكن بعد شويه وانا بتابع ريم ماجد والشهدا دول اللي ملفوفين في علم مصر لقيت الموضوع اخد شكل تاني .. اكتشفت ان الشهدا دول اللي ملفوفين في اعلام مصر كتر خيرهم في منهم 17 شهيد جايين بلبس السجن ..

لا اله الا الله 

دول ناس لها ملفات ولها اهل وفي ليهم بيانات في دفاتر السجن .لكن شويه كده وعرفت في حلقه يسري فوده ان احد اهالي المفقودين من يوم 28 يناير بيدور علي ابنه يا ولداه 

وراح المشرحه 10 : 15 مره وكان بيعاني علشان يدخل والمفاجأه اللي بجد اذهلتني 

ان الراجل المسكين ماخدوش منه عينه يقارنوها بالموجودين في المشرحه . والسبب ان بصمة المتوفين لم تقرا شيئا يعني معندهموش بصمه للناس دي من اساسه ده علي كلام الراجل 

الله  يعني افهم من الكلام ان مافيش بيانات مع ان 17 جايين بلبس السجن يعني ليهم مش بيانات ليهم ملفات 

وكمان المتوفين دول شكلهم من الصعب يمكن من المستحيل التعرف عليه 

ما هو لما يبقي واحد ميت بقاله اربع شهور ومرمي في التلاجه لازم معالمه تكون اتغيرت ده بالاضافه للتشريح والبهدله والجتت المضروبه وطالع روحها . يعني باختصار كده اللي له ميت في المشرحه مستحيل انه يتعرف عليه

والكارثه الكبيره اللي فاجئتني ان في حوالي 1000 اسره ليهم مفقودين" الف " يا نهار مش فايت 

يعني افهم من الكلام ان لسه في الف مفقود ما بين ميت ومسجون ومعتقل وغيره يا صلاة النبي احسن طب فين الناس دي

لما يبقي المشرحه مافيهاش الا 19 جثه  

يبقي في حاجه غلط 

من المؤكد في حاجه غلط 

لما يبقي ناس بلبس السجن في المشرحه ويدفنوا في مدافن صدقه ومافيش بحث وتنقيب عن هويتهم 

يبقي في حاجه غلط

لما ييجي عم البيه المنسق لشئون الشهداء ولا باين لما يسري فوده سال ازاي لحد دلوقتي مافيش لجنه لمتابعة امور الشهداء واسرهم بعد ربع ساعه الحقيقه طلع علينا البيه  بمنتهي الوقاحه علشان يبدأ كلامه ويقول احنا كان المفروض نولع فيهم او نرميهم في النيل علشان دول بلبس السجن . هو ده اللي ربنا قدره عليه التريأه 

دون ابداء اي استغراب الحقيقه او استنكار من اللي سمعه علي اساس انه اتفاجئ بالموضوع وما كان منه الا انه قفل السكه في وش يسري وحرق دم الراجل يا ولداه 

..لما يبقي ده المنسق لدعم اسرالشهدا 

يبقي في جاجه غلط 

لما تكون دي طريقته مع الاعلام اللي حيوصل للمشاهدين يعني فئه كبيره من الشعب بالوقاحه دي .. امال حيعمل ايه في اسر الشهدا حيضربهم بالجزمه بقه 

في حاجه غلط

لما الاقي الثوار اللي داقوا المر وشافوا الموت بعينهم ميحضروش دفن ال 19 شهيد اي ما كانوا 

يبقي في حاجه غلط

احنا ليه بنطلع نطلع وننزل علي مافيش . احنا ليه ماشين كده من غير اي هدف . احنا ليه مش بنضغط علشان  نوصل للي عايزينه 

مين فينا حاسس اننا بنتقدم للامام . انا شايفه اننا بنرجع للخلف 

انا شايفه ان لازم نرفع لافتات في كل مكان ننبه الناس 

"احترس الثوره ترجع الي الخلف "

الثوره اللي مشت رأس النظام ممكن تعمل الكتير والكتير

لو عايزين وعندنا اصرار علي التغيير حنتغير .لو حنام ونستسلم للقدر عمرنا محنتغير 

دي بلدنا ..ومستقبلنا ..ومستقبل ولادنا

 لازم نحس بالتغيير لازم يبقي في احترام للبني ادمين

لكن دلوقتي لا في احترام لادمين عايشين ولا احترام لحرمة ميتين 

يا جماعه اصحوا ... فوقوا 

لازم نحط ايدنا في ايد بعض من تاني

لازم نبقي قلب واحد تاني 

لازم نجمع كلمتنا من تاني 

لازم تترابط كل الائتلافات من تاني 

لازم تتوحد الجهود من تاني 

لازم نحس ان في حاجه غلط علشان نكمل المشوار  

نكمل حكاية ثورتنا اللي عمرها ما حتكمل الا بارادتنا 

فين الاراده ... فين الحماس ... فين الثوره 

لازم نرفع شعار جديد "الشعب مع الشعب ايد واحده "

الشعب هو اللي كتب البدايه وعليه ان يستمر في الكتابه حتي يكتب النهايات السعيده بيده  

انا اريد وانت تريد والمجلس العسكري يفعل ما يريد

• انا اريد وانت تريد والمجلس العسكري يفعل ما يريد

من هذا المنطلق تدار البلاد في هذه الفتره .. فالكل يعترض والمجلس العسكري لا يبالي 

الكل يهتف والمجلس العسكري لا يسمع .. لمصلحة من لا أدري 

 اذا نظرنا مثلا الي انتخابات مجلس الشعب التي يصر المجلس العسكري علي موعدها في 

سبتمبر المقبل رغم كل الاعتراضات والرفض من كل القوي السياسيه علي الساحه 

ما عدا شلة المنتفعين ولا يخفي علي احد من هم هؤلاء ؟؟؟؟؟؟؟؟؟؟

ولكن المجلس العسكري وكأنه لا يسمع 

ودعونا نري ماهية عواقب الانتخابات التشريعيه في ظل اصرار المجلس العسكري عليها 

اولا بالنسبه لوضوع مشروع قانون مجلس الشعب اللي ربنا لوحده اللي يعلم اذا كان 

الوفاق الوطني وتوصياته حيكون لها دخل  في تعديله ولا هو كده واللي مش عاجبه يخبط

 راسه في ميدان التحرير 

ولو كان زي ما هو والنسبه ثلث قوائم مغلقه وثلثين فردي تبقي كارثه 

كارثه في ايه ؟؟؟؟؟؟ الانتخابات  الفرديه اولا بتكون معركتها طاحنه وفي عز وجود 

امن العادلي وما ادراك ما امن العادلي.كانت هناك معارك وقتل وضرب نار ومشاكل 

لا تحصي فما ادراك بامن العيسوي وما نحن فيه من انفلات فيخيل الي انها ستكون اشبه 

بحروب اهليه في حال قيامها بهذه الطريقه وفي هذا التوقيت 

كما ان الانتخابات الفرديه ستفرز لنا نفس النوعيه السابقه من الاعضاء الذين  لا يمثلون 

 الشعب تمثيلا حقيقيا ولكن المعركه تحسم لصالح اليد العليا الا وهي الماده ومعايير اخري 

غير معيار الرجل المناسب في المكان المناسب 

النقطه الثانيه انه لابد لنا ان نعي تماما ان هناك حوالي 5000 قريه ونجع في جمهورية 

مصر العربيه يمثلون اكثر من 45 مليون مواطن . منهم حوالي 25 مليون صوت انتخابي 

يعني يقدروا وبجداره يشكلوا شكل المجلس حيكون ايه ودي كارثه تانيه 

لان الناس دي بتنتخب علي معيار النسب والقرابه والعصبيه والقبليه وليس معيار الكفاءه 

علي الاطلاق 

النقطه الثالثه الفردي اللي بيمثلوا ثلثي المجلس عباره عن مين؟! يا اما حزب وطني 

او اخوان مسلمين او الناس اللي كانت ملهاش فرص زمان او الشباب الجديد  

وطبعا حتتحسم لصالح الاخوان والوطني من مبدأ اللي نعرفه احسن من اللي منعرفهوش

لان هؤلاء المرشحين يطلق عليهم النواب بعدتهم والمقصود بالعده العزوه والمال 

النقطه الرابعه .   ثلث القوائم اللي حتنزل حتتشكل من الاحزاب الموجوده علي الساحه

اللي اضلا الجديد منها لم ينظم نفسه بعد ومش معروف لدي الشارع ومالوش تاريخ يستند

عليه لكن المنظمين معروفين وفرصته كبيره جدا ان لم تكن فرصه من ذهب علي طبق 

من فضه

اذن هناك شيئا يدار من وراء الستار لا يعلمه المشاهدين ولكن المشهد وراء الكواليس 

يموج بالحداث التي لا نري منها سوي ما يراد لنا ان  نراه علي المسرح السياسي في 

مصر

افيقوا يا شباب الثوره ان الاتحاد قوه .. الاتحاد قوه .. الاتحاد قوه 

لكي الله يا مصر   

  

معلش احنا بنتبهدل

اسمحولي افتح قلبي معاكو شويه ونشوف كده احنا رايحين فين ونشوف الصوره شكلها ايه 

انا شايفه ان احنا رايحين سكه مش حلوه سكه حترجعنا لقبل 25 يناير بس اسوا شويه 

ممكن حد يرد علي ويقولي انتي متشائمه ممكن لكن اللي بيحصل هو اللي موصلني لكده 

انتو عارفين مثلث فرعون وهامان وقارون 

فرعون اللي بيمثل الحاكم  وهامان بيمثل العقل المدبر اما قارون فهو راس المال 

الثالوث ده كان ايام النظام السابق وكان مبارك المخلوع هو فرعون وزكري عزمي واحمد عز وشاكلتهم بيمثلوا هامان ورجال الاعمال واعضاء مجلس الشعب بيمثلوا راس المال 

المشكله مش في الثالوث لان الثالوث ده هو اللي بيبني كل البلاد المهم توصيفه 

احنا كان الحاكم فاسد والعقل المدبر منافق بالي متهالك جاهل ورأس المال ملوث 

والشعب يا ولداه كان ناتج مساحة هذا المثلث الهالك اللي نتيجته كانت الجهل والتخلف والخوف والقهر والفراغ الفكري 

ام دلوقتي فالثالوث برده موجود بس مع الاختلاف الحاكم المجلس العسكري اللي هو امتداد لفكر وفساد مبارك والعقل المدبر امثال يحيي الجمل واشكاله والخوف كل الخوف ان يكون الاخوان المسلمين من ضمن عناصر العقول المدبره    اما راس المال فهو كما هو الفلول ورجال الاعمال 

وتصنيف المثلث ده من وجهه نظري هو ناتج ضرب القمع والدكتاتوريه [فرعون] 

والعقل المرتعش المنافق والتابع البالي [هامان] 

وراس المال اللي مازال ملوث [راس المال ] 

يا تري مستنين الناتج يكون ايه تفتكروا حيكون نفس ناتج المثلث القديم ولا حيكون اسوا المره دي بعد الثوره والشهداء والعمي والاصابات اللي بالجمله اكيد النتيجه حتختلف 

وهما حل من اتنين يا حيكون انفجار مدوي من الشعب اللي فاق ودي الكارثه اللي انا خايفه منها 

يا اما حيكون شعب اكثر قمعا واكتر خوفا من  قبل كده

وانا رايي ان الانفجار حيكون النتيجه الكارثيه 

لان بمنتهي البساطه المجلس العسكري الموقر حيتصدي لاي انفجار شعبي بانفجار عسكري 

وهنا المشكله لان انا شايفه بصراحه شديده ان المجلس بدا في سكه مكشوفه سكه مفضوحه مش بتقول غير حتمشوا بالجزمه من هنا ورايح 

حد يقولي يعني ايه كل يوم والتاني يتجرجر صحفيين علي النيابه العسكريه 

شدة ودن وبعدين تهديدات اشكال والوان علشان الشده تذيد شويه وبعد كده حتبقي احكام عرفيه وكمان حبه حيبقي ضرب بالبرطوشه واللي مش عاجبه يخبط راسه في ميدان التحرير 

يبقي لازم نفوق ولازم نصحصح وكمان الاعلام لازم يشد حيله شويتين وبقصد بالاعلام الاعلام الشريف مش اي اعلام 

لان احنا في مرحله اكون او لا اكون 

يا اما اكون مصري حر او مصري مقهور 

انا عن نفسي عمري ما حرضي بالقهر تاني عمري محسكت تاني حتي لو حبسوني 

يا اما اعيش حره يا اما اموت اكرملي 

وبلاش ننسي شعار ارفع راسك فوق انت مصري